Sahoor Shohar Aur Kitchen Ka Dangal
Aaj ka din bhi naye azam ke sath shuru hoa… yani neend puri na hone ke azm ke sath! Subha aankh khuli tu sab se pehla khayal aya: thori dair aur so jaoon! Magar jab ek dafa aankh khul jaye, tu dubara neend aani namumkin ho jati hai.Matlab, raat ko bhi neend ka koi hisaab nahi aur subha uth ke aisa lagta hai jaise kisi ne battery adhi charge pe hi nikal di ho.
Aaj kal Ramzan chal raha hai, tu fajar bhi jaldi ho jati hai. Socha,chalo sahoor ka time khatam hone se pehle apne aziz shohar ke liye kuch bana du, taake baad mein Sultan Rahi ki tarah aankhein na dikhaye ke ‘biwi ko poochti nahi Warna yeh aadmi kabhi seedhe muh shukria tu keh nahi sakte, lekin agar ek dafa sahoor miss ho jaye tu aise gussa karein ge jaise kisi ne unki purani video cassette rewinder ke baghair chala di ho.
Uth ke neeche aayi aur kitchen ka hal dekha tu bas ek hi baat zehan mein aayi: “Yahan tu roz ka yahi tamasha hai!” Har jagah plates, bartan, aur aik ajeeb si cheezein jo samajh nahi aati ke yeh kahaan se aayi hain. Yeh kitchen hai ya koi battlefield? Fridge khola tu aik ajeeb si cheez dekhi doodh ka dabba bilkul khatam,lekin wapis fridge main rakha hoa tha. Matlab, yeh sirf Ramzan ka moajza ho sakta hai jo log khaali cheezon ko bhi fridge mein rakh ke samajhte hain ke refill ho jayegi.
Khair, dil mazboot kia, chai ka paani chadhaya aur anday banane ka irada kia. Itna sab kuch jaldi jaldi karne ke baad jab sahoor ka waqt khatam hone wala tha, tab ja ke shohar sahab izzat afroz huye, ek haath aankhon par aur doosra taqreeban deewar par rakh ke aaye, jaise abhi kisi bhoot ka samna kar ke aaye ho. Aate hi pehla sawal:
‘’Kya banaya hai ? ‘’
Mujhe ek second ke liye to laga yeh koi MasterChef ka judge hai jo mujhe test karne aaya hai. Khair, plate unke samne rakhi, unhone ek nazar daali, ek hmmm ki aawaz nikali aur bina kuch bole khaana shuru kar diya. Matlab, agar shikayat hoti tu foran kehte, lekin jab sab kuch theek ho tu sirf khamoshi? Yeh aadmi bhi na!
Jab sahoor khatam ho gaya,tabhi ek zyada azeem sawal aaya: “Pani pila do.”
Matlab, jitna bara aadmi,utna hi zyada masoomiyat ka level. Itna bhi mushkil hai khud uth ke pani lena? Magar Ramzan main sabar aur shukr ka daur chalta hai, tu maine ek lambi saans li aur pani ka glass haath main diya.Us waqt mujhe samajh aya ke asal ibadat yeh hai!
Sahoor ke baad jab sab log wapis apne apne kamron ki taraf nikal gaye,tab mujhe realize hua ke ab is battlefield ki safai bhi mujhe hi karni hai. Phir ek khayal aya: Qudrat ne hume subha subha uthne ka moka diya hai, tu kyu na is moka ka faida uthaya jaye? Matlab,sirf sochne ka,kaam waise bhi baad mein karungi.
Aur yoon har din ek naye azam ke sath shuru hota hai… aur naye tamashay ke sath!
Very well said 👏🏻