Ghar ka Apna Shahrukh Khan

Tujhe Dekha Toh Yeh Jana Sanam Safai Aati Hai Mujhe Dil se Pasand!”

Toh baat yeh hai ke,kal mera ek glass ka jug, jo bada pyara sa tha, ek dramebaaz hero ki tarah zindagi se exit le gaya. Main cabinet fix karne mein lagi thi, thodi si carpenter wali vibe le rahi thi, ke achanak woh jug dham se neeche gira. Aur yeh banda akele thodi na girta, apne sath ek bowl aur chai ka cup bhi le aaya teenon ne milke ek chhota sa “smash hit” show kar diya. Sheesha idhar udhar, bowl ke tukde, aur chai ka cup toh maano bol raha ho, “Main bhi hero hoon, mujhe bhi yaad rakho!”

Tabhi mere husband, jo waise toh ghar ke silent hero hain, scene pe ekdum Bollywood style enter hue. Fikarmandi bhari awaaz mein poochte hain, “Kuch laga toh nahi?” Main toh waise bhi thodi si overacting ki shauqeen hoon, socha heroine banne ka mauka hai. Badi filmy andaaz mein boli, “Nahi, bas halka sa paon pe laga hai,” jabki sach bolun toh paon pe kuch laga hi nahi tha main toh bas pose maar rahi thi, heroine jo banni thi!

Phir kya, maray husband na idhar dekha, na udhar, seedha toote hue sheeshe ke saath apni action movie shuru kar di. Jhadoo nikala, pocha liya, aur jo kitchen waise bhi thodi si TLC (tender loving care) maang raha tha, usko ekdum chamka diya. Sheesha saaf karte karte, cabinet polish karte karte, sink tak chaka-chak ho gaya. Ekdum aisa laga jaise maray husband koi “Kitchen Makeover” reality show kay winner hoon!

Saara kaam khatam karke jab main peeche hatke kitcehn kay  kaam ko dekha, toh dil se awaaz aayi Shahrukh Khan ki kya zaroorat hai bhai? Jab ghar mein apna personal SRK hai jo na sirf hero ban ke entry maarta hai, balki tension mein bhi saath deta hai. Yeh hai meri chhoti si kahani, jahan ek toota jug meri zindagi ka turning point ban gaya, aur kitchen ekdum Bollywood set jaisa chamak utha! Ab agli baar jab jug tootega, toh soch rahi hoon, pura ghar hi chamka doon kya pata, husband SRK ka role aur bhi bada ho jaye!

written by Amna