Eid ka din ho aur farshi shalwar na ho? Haye, yeh tu tauheen-e-tradition hai! Har saal mai apne dukh bhool ke naye fashion ka shikar ban jaati hoon, aur is dafa bhi kuch alag nahi tha.Farshi shalwar lene ka faisla maine kisi aur ki dekhi dekhaai pictures dekh ke kia tha jahan larkiyan isko pehn ke aise khari hoti hain jaise kisi shahi mahal ki rajkumari ho. Magar asal zindagi main yeh shahi look sirf tasaveer tak hi mehdoood rehta hai, baaqi sirf ranj-o-gham hotay hain!Subha Eid ki tayyari shuru ki,shalwar pehni aur foran ek ajeeb sa realization hoa“Yeh tu sirf kapra nahi, yeh ek zimmedari hai!
”Jitna kapra isme istemal hoa hai, utne main tu puri street ke naye curtains ban sakte thay! Pehli dafa mehsoos hoa ke Eid ki namaz par jana sirf ek ibadat nahi, balki ek adventure bhi hai. Ek ek qadam soch samajh ke uthana par raha tha ke kahin gir ke waqai Eid Mubarak na ho jaye!
Ghar se nikalna bhi aik mission tha. Pehle to farshi shalwar ne gate ki ek ek bar ko jor jor se salam kiya, phir jab car main baithi tu lagay aise koi bara sa shaadi ka tent andar ghusa diya ho! Piche baithne walon ne foran apni jagah adjust ki, ek ne tu seedha keh diya:
“Baji, agay wali seat bhi le lo, waise bhi lagta hai aap ki shalwar ko do jagah chahiye!”
Eid milan party ka asli maza tab aya jab sab se pehli aunty mili aur kehne lagi:
“Beta, mashallah se bohot piyari lag rahi ho…bas dhyan rakhna, kahin bachay tumhari shalwar ka jhoola na bana lein!”
Unka mashwara mujhe pehle kyun nahi mila?Kyunki 10 minute baad ek chhota bacha waqai mujh se chipak gaya aur bola:
“Aapi, mujhe bhi apni shalwar pe swing karna hai!”
Khane ka time sab se bara test hota hai. Eid ki dawat main ek haath se plate uthani, doosre se shalwar ko sambhalna, aur teesre (jo hota hi nahi!) se balance bana ke qorma bachana. Ek point pe to mujhe laga ye kapron ka fashion nahi, aik full-body workout hai! Ek bar meri shalwar par aik aunty ka chai ka cup girne wala tha, lekin maine apni reflexes ka istamaal kiya aur usko bachaliya. Mujhe khud pe fakhar mehsoos hoa, magar aunty ne kaha:
“Haye beta, shalwar ki fikar hai, aunty ki nahi?”
Ab aunty ko kaise samjhati ke yeh shalwar bhi meri izzat ka masla hai?
Raat tak jab sab Eid enjoy kar ke thak chuke thay, mai sirf ek soch rahi thi:
“Agli dafa farshi shalwar bilkul nahi pehnni!”
Lekin mujhe pata hai, agle saal phir wahi mohabbat jagay gi, phir koi “new trending style” mujhe dhoka dega, aur phir mai apni chalti phirti dastarkhwan wali zindagi jeene ke liye tayar ho jaoongi